"Знічка": творы па-беларуску!

31 траўня - Зміцер Сасноўскі прэзентуе сваю кнігу

prague_walks — Mon, 28 May 2012 20:05:29 GMT

У кнігарня "логвінаЎ” (Незалежнасці, 37а) супольна з агульнанацыянальнай грамадскай кампаніяй "Будзьма беларусамі!” адбудзецца прэзентацыя кнігі музыкі і даследчыка старажытнай культуры Зміцера Сасноўскага ("Стары Ольса")

"Гісторыя беларускай музычнай культуры XIX – XX стст.”

У імпрэзе, акрамя аўтара, бяруць удзел:

Яўген Барышнікаў, дуда

Алесь Чумакоў, гуслі

Анатоль Тарас, заснавальнік серыі кніг "Неизвестная история”

Па заканчэнні выступу можна будзе атрымаць аўтограф ад аўтара. Пачатак а 19, уваход вольны.

Крыху пра аўтара. Зміцер Сасноўскі – музыка (гурт "Стары Ольса”), гісторык, папулярызатар сярэднявечнай і дударскай музыкі, аўтар кніг "Гісторыя беларускіх музычных уплываў”, "Музычная культура рыцарскага саслоўя Вялікага Княства Літоўскага і Каралеўства Польскага”, "Гісторыя беларускай музычнай культуры: ад старажытнасці да канца XVIII ст.”, асоба кампаніі "Будзьма беларусамі!”.

Крыху пра кнігу. Гэтая кніга – другая частка даследавання аўтара. Першая ("Гісторыя беларускай музычнай культуры: ад старажытнасці да канца XVIII ст.”) пабачыла свет у 2010 годзе. Кніга прысвечана асноўням падзеям і тэндэнцыям развіцця беларускага музычнага мастацтва ХІХ і ХХ стст. Некаторыя тэмы ўпершыню закранаюцца ў беларускай музычнай літаратуры, многія крыніцы ўпершыню ўведзены ў навуковы ўжытак. Дэтальна і цікава апісаны народныя інструменты, тэатральнае мастацтва, інструментальная і вакальная музыка, жыццё і дзейнасць беларускіх кампазітараў дадзенага перыяду, шмат фотаздымкаў і малюнкаў.

крыніца

"гарачы травень": шэраг імпрэз

prague_walks — Wed, 16 May 2012 06:14:23 GMT

У траўні ў кнігарні "ЛогвінаЎ", што на праспеце Незалежнасці 37А, практычна сапраўдны фэст!

21 траўня

Што было б калі Чарнобыль выбухнуў у густанаселенай заходняй Еўропе. Адказ - у рамане нямецкай пісьменніцы Гудрун Паўзэванг "Хмара". Яго прэзентацыя з перакладнікам Уладзімірам Папковічам. Пачатак а 19.

22 траўня. Малады пісьменнік Сяргей Календа
прадставіць сваю новую кнігу "Трохлітровая проза".
Пачатак а 19.

23. НОЧ У КНІГАРНІ. У нязмушанай атмасферы: з коўдрамі, гарбатай і паўлежачы мы сустрэнем золак дня славянскай пісьмовасці. Адам Глобус прачытае новую серыю сваіх жахалак "Крутагорскія казкі", а Ігар Бабкоў прадставіць перавыданне свайго культавага рамана "Адам Клакоцкі і ягоныя цені".
Увага! Пачатак імпрэзы а 23 ночы.

29 траўня. Зорка ўкраінскай літаратуры Сяргей Жадан у Мінску. Прэзентацыя беларускай версіі рамана "Анархія ва Ўкраіне". З удзелам самаго Сяргея і яго беларускіх перакладнікаў. Вядоўца - Андрэй Хадановіч. Пачатак а 19.

30 траўня. Сам-насам з Жаданом. Каму яшчэ не надакучыць Сяргей учора, запрашаеюцца 30 на гутарку ў форме інтэрв'ю. Больш рафінаваная і сустрэча з героем постсавецкай літаратуры. Пачатак а 17.

крыніца

2 траўня - прэзентацыя рамана “Мінакі” Аляксея Талстова

prague_walks — Thu, 26 Apr 2012 18:16:04 GMT

2-га траўня ў сераду ў кнігарні логвінаЎ (праспект "Незалежнасці" 37а) адбудзецца прэзентацыя рамана Аляксея Талстова "Мінакі".

Аўтар патлумачыць што да чаго, нешта пачытае, адкажа на пытаньні. Колькі словаў скажуць Зміцер Вішнёў і Кацярына Макарэвіч.

Вядучая імпрэзы Вольга Гапеева. Будзе музыка.

пачатак а 19. Уваход вольны.

крыніца

Выйшла Эўрыпідава "Медэя" ў перакладзе Баршчэўскага

prague_walks — Tue, 24 Apr 2012 19:32:17 GMT

Так, у новым, 57-м, нумары "Дзеяслова" - пераклад старагрэцкай драмы пра маці-дзетазабойцу Медэю.

Чым розніцца пераклад Баршчэўскага ад, скажам, расейскага? Большай адпаведнасцю арыгіналу. Спадар Лявон не выдумляў сюжэт, каб прыстасаваць да п’есу да цяперашняга чытача, а перакладаў як яно ёсць, з усімі незразумеласцямі і шурпатасцямі. Можаце пераканацца самі, наколькі логіка грэкаў адрознівалася ад нашай, асабліва ў абгрунтаванні забойстваў.

Акрамя гэтага ў нумары: паэзія Алеся Разанава і Сяргея Прылуцкага.

Аляксандр Фядута публікуе прозу пад назвай "Мама. Горкі раман” са сваёй кнігі ўспамінаў "Мой маленькі Парыж”.

Напрыканцы часопіса караценькія агляды кніжных навінак.

крыніца

Абвясцілі намінантаў на прэмію “ПрайдзіСвета”

prague_walks — Tue, 24 Apr 2012 19:08:47 GMT

Часопіс "ПрайдзіСвет” вырашыў больш не зацягваць інтрыгу і завершыць сёлетні сезон літаратурных прэміяў, у якім ужо вядомыя пераможцы прэміі імя Ежы Гедройца, прэміі "Дэбют” імя Максіма Багдановіча, прэміяў "Гліняны Вялес” і "Залаты апостраф”. Зрэшты, імёны лаўрэатаў прэміі часопіса "ПрайдзіСвет” традыцыйна будуць названыя бліжэй да дня нараджэння часопіса ў канцы траўня, а пакуль прапануем шорт-ліст, нагадваючы, што кожны з намінантаў варты самай пільнай чытацкай увагі.

Проза

1. Альгерд Бахарэвіч: Шміт, Катрын. Ты не памрэш: раман / пер. Альгерда Бахарэвіча. — Мінск: "Макбел”, 2011.
2. Алеся Башарымава: Янсан, Тувэ. Капялюш чарадзея / пер. Алесі Башарымавай. — Мінск: Зміцер Колас, 2011.
3. Марына Шода: Мілаш, Чэслаў. Родная Еўропа / пер. Марыны Шоды. — Мінск: І. П. Логвінаў, 2011.
4. Сяргей Шупа: "Сараеўскае Мальбара” Міленкі Ергавіча, ARCHE-Пачатак: Уяўляючы Балканы. 2011, №4.

Паэзія

1. Марыя Мартысевіч: пераклады з кнігі "Амбасада” (Амбасада: вершы свае і чужыя. — Мінск, "Кнігазбор”, 2011), "Нябожчыкі дамовіліся маўчаць” Веньяміна Блажэннага ("ПрайдзіСвет” №8).
2. Вальжына Морт: "На танцах у Адэсе” Іллі Камінскі ("Дзеяслоў” №53).
3. Дзмітры Плакс: Фростэнсан, Катарына. Чыстая краіна: вершы / пер. Дзмітрыя Плакса. — Мінск: "Медысонт”, 2011 (серыя "Бібліятэчка Дзеяслова”).

ПрайдзіСвет:

1. Сяргей Балахонаў: "Вар’яцкі год” Мікіты Славінскага ("ПрайдзіСвет” №8).
2. Антон Францішак Брыль: паэзія з польскай і лаціны (Францішак Дыянізі Князьнін, Юльян Урсын Нямцэвіч, Антоні Эдвард Адынец, Гай Валерый Катул).
3. Кірыл Карлюк: Лісты Купідона: Багуслаў да Ганны Марыі Радзівіл.
4. Ігар Скрыпка: "Мараход” Ежы Шаняўскага (п’еса).
5. Андрэй Стэфановіч: паэзія з ангельскай і французскай (Рэд'ярд Кіплінг, Сулейман Дыяманка, Эрнэст Сава).
6. Анка Упала: "Рэч Мялешкі, кашталяна Смаленскага, на засяданіі правіцельства ў Варшаве ў 1589 гаду”.

Абіраць найлепшыя ў кожнай намінацыі пераклады будзе журы, у склад якога сёлета ўвайшлі: перакладчык і выкладчык Марына Казлоўская, перакладчык і сябра рады часопіса "ПрайдзіСвет” Кацярына Маціеўская, пісьменнік, рэдактар часопіса "Дзеяслоў”, старшыня СБП Барыс Пятровіч, перакладчык і выкладчык Сяргей Сматрычэнка, кандыдат філалагічных навук і літаратуразнаўца Аляксандр Фядута, паэт, перакладчык і старшыня Беларускага ПЭН-Цэнтра Андрэй Хадановіч, перакладчык і сябра рады часопіса "ПрайдзіСвет” Ганна Янкута.

крыніца

новы дызайн!

prague_walks — Tue, 24 Apr 2012 14:59:31 GMT

Прывітанне ўсім! Рады паведаміць, што ў нас новы дызайн і баявы настрой для разнастайных здзяйсненняў! Жадаем усім удачы і поспехаў!

З павагай, адміністрацыя сайта,

prague_walks

Паэты пакалення “тутэйшых”: Тацяна Сапач.

prague_walks — Tue, 20 Dec 2011 18:39:39 GMT

Паэты пакалення “тутэйшых”: Тацяна Сапач. Вечар памяці. Вершы Тацяны Сапач, што трагічна загінула 27 снежня 2010 года, чытаюць – і вытлумачваюць -- паэты яе пакалення: Галіна Дубянецкая, Ігар Бабкоў, Славамір Адамовіч, Юрась Пацюпа ды інш. ЗЫ. Кася Камоцкая сьпявае. Час: 21 снежня. 19.00 Месца: Кнігарня ЛогвінаЎ. Прашпект Незалежнасці, 37а крыніца

Эксурсія па кнігарні "логвінаЎ" і выдавецтве "Логвінаў"

prague_walks — Thu, 20 Oct 2011 16:12:52 GMT

У праграме экскурсіі:

- адведзіны нулявога кніжнага кіламетра
- аповяд пра кніжныя навінкі 2011 года
- раскрыццё ўсіх таямніц беларускага гандлю кнігамі
- фатаграфаванне с экспанатамі кнігарні і Ігарам Логвінавым

Сустракаемся 25 кастычніка (аўторак) а 19-00 ля вечнага агню на Плошчы Перамогі, ці а 19-15 ля ганку кнігарні "логвінаЎ” (Незалежнасці 37А). Экскурсія – бясплатная.

крыніца

Прэзентацыя новага "Дзеяслова"

prague_walks — Thu, 20 Oct 2011 08:39:07 GMT

Рэдакцыя літаратурна-мастацкага часопісу «Дзеяслоў» запрашае правесці разам вечар. Сустрэча прымеркаваная да выхаду 53-га нумару.
уДЗЕльнічаюць:

Ігар Бабкоў
Леанід Дранько-Майсюк
Віктар Жыбуль
Людміла Рублеўская

мадэратар: Анатоль Івашчанка

віктарына на веданне міфалогіі «Дзеяслова»!

Імпрэза ладзіцца ў межах грамадскай кампаніі «Будзьма!»

месца ДЗЕяньня:
кнігарня "логвінаЎ" (пр. Незалежнасці, 37А)

крыніца

Прэзентацыя “Стэпавага ваўка” Германа Гесэ па-беларуску

prague_walks — Fri, 16 Sep 2011 09:40:16 GMT

У межах "Месяца нямецкай літаратуры ў кнігарні "логвінаЎ” 19 верасня адбудзецца прэзентацыя беларускай версіі кнігі Германа Гесэ "Стэпавы воўк” ў перакладзе Васіля Сёмухі.

Запрошаныя госці – Лявон Баршчэўскі, Зміцер Колас і Андрэй Хадановіч.

Адрас кнігарні: (Незалежнасці 37А)

Пачатак а 19-й гадзіне.

Уваход – вольны.

крыніца